Jæja þá er komið að röfli dagsins. Afsakið hléið, hafði lítið að segja. Nema hvað í dag ofbauð mér og þá er best að setjast við tölvuna og koma því á blað.
Við fjölskyldan + vinur mýslu ákváðum að fara í bíó og sjá Shrek III og eftir að hafa eytt óhemju magni af peningum í bíómiða og slikkerí, fundum við sætin okkar og komum okkur fyrir. Auglýstur sýningartími var kl tvö og við vorum sest um tíu mínútur í en viti menn...myndin sjálf byrjaði ekki fyrr en klukkan hálfþrjú eftir að við höfðum setið yfir auglýsingum í 30 mínútur!
Eftir að þeim lauk var lögst yfir augu mín rauð bræðiþoka sem virðist ágerast eftir því sem ég eldist.
Ég þoli ekki þegar er verið að hafa mig að fífli að ráði markaðsfræðinga og auglýsingasálfræðinga sem sitja daglangt og reyna að koma upp með nýjar leiðir til að taka yfir líf mitt....með rusli og drasli og ömurlegum boðskap. Mér finnst ég ekki geta snúið mér við án þess að einhver sé að reyna að selja mér eitthvað. Djöfulsins græðgi sem er að tröllríða öllu í þessum heimi hér. Það er reynt að kreista eins mikinn gróða útúr öllu eins og mögulegt er. Meira að segja fólk er ekki lengur fólk...það er mannAUÐUR...allt er reiknað í krónum og aurum - tapi og gróða. Næst á dagskránni er að setjast niður og semja bréf til ODEON kvikmyndasamsteypunnar og æsa mig yfir þessu...gott og vel...ég er óþolandi kvartskjóða en eins og maðurinn sagði THIS IS TAKING THE PISS!!!